CEIP L´Ablanu

Al recuperase ente los años 70-80 la fiesta del Antroxu, bona parte de la tradición astur taba desapaecida o sumida nel escaezu. Por eso, al "reponer" la fiesta fízose munches veces ensin tener en cuenta les característiques de les Mazcaraes asturianes. Amás, bona parte de la población asturiana naciere y creciere dientro de les cuatro décades de dictadura que torgaron esta festividá. La tradición astur, salvo en dellos casos, taba práuticamente desapaecida.

Por eso, cuando dellos conceyos quixeron entamala colos actos del Antroxu ellaboraron un programa que yera, más qu'un Antroxu Astur, un calcu del Carnaval de Río de Janeiro nel qu'hasta les murgues y comparses danzaben al son del ritmu brasileiru. A fin de cuentes nun se facía otro qu'imitar lo que se vía pela televisión. De toles maneres en munchos llugares fue recuperándose l'Antroxu típicu del llugar, anque siempre reducíu a los cuatro díes clásicos ente'l Domingu'l Gordu y el Martes d'Antroxu. Inclusu en delles localidaes allarguen o treslladen les Mazcaraes más allá del Miércoles de Ceniza, pero enxamás se-yos ocurre recuperar l'ANTROXU YA ,EL DÍA NAVIDÁ, comu se facía antañu.

Agora conviven nel Antroxu les tradiciones asturianes coles tradiciones del "Carnaval" d'otros llugares, nuna mistura asemeyada a la que se ta dando en toa Europa. De toes formes el creciente puxu recuperador del Antroxu Astur, rellacionáu con toles demás muestres de la nuestra cultura, va a más, gracies al esfuerzu creciente de muncha xente.